Boranatti Milishaan qarshii 50 nuu kennuu diddan jechuun dhukaasee lubbuu baase

Kibba Oromiyaa Booranatti milishaan qarshii 50’f Konkolaachiftoota Mootoraa irratti dhukaasa banuun lubbuu galaafatan.

Oromiyaa keessatti Milishoonni akka feetee taa’aa jiru jechuun komiin hawwaasaa akkuma irra deddeebiin dhagaa’amu milishoonni konkolaachiftoota mootoraatti dhukaasa banuun lubbuu galaafachuu himamaa jira

Taateen kun Kibba Oromiyaa godina Booranaa aanaa Miyootti ganda Bokkuu Luboomaatti Kamisa Fulbaana 19,2024 galgala naannoo sa’aatii 3:30 irratti raawwate jedhan.

Gabaasni kun akka eeretti dhukaasa humnoonni nageenyaa konkolaachisoota motoraa irratti bananiin lubbuun dargaggoo tokko darbeera.

Dhukaasa milishoonni mootummaa bananiin kan du’een ala namoonni biroo lama madaa’uu barameera. Dhukaasni kun konkolaachiftoota Mootora afur irratti banamee nama Qaallicha Galgaloo jedhamu ajjesuu himame.

Dhukaasa kana kan bane miseensota milishaa ta’uu kan eere gabaasni kun, dargaggoo lubbuun isaa dabarte dabalataan konkolaachiftoonni lama biroo madaa’uu fi inni tokko miliquu himeera.

Miseensonni milishaa kunneen dhukaasa kana kan banan “sababa konkolaachiftoonni kunneen kaffaltii kottee jedhamu qarshii shantama milishaan gaafate kaffaluu didaniif” ta’uu gabaafame